МНР со став во врска со информацијата која дојде од редовите на ВМРО-ДПМНЕ за наводниот мегаскандал со македонскиот амбасадор во Јапонија.
„Како што веќе објавивме, повлекувањето на досегашниот амбасадор во Јапонија беше спроведено во редовна постапка, согласно законските прописи и внатрешните уредби во Министерството за надворешни работи и со почитување на сите процедури.
Во оваа прилика дозволете да информираме дека Комисијата во рамките на Министерството, како причини за повлекувањето на амбасадорот констатираше причини кои не се совпаѓаат со нападите изнесени од страна на ВМРО-ДПМНЕ и нивните претставници“, велат од ова министерство.
Со пласирањето шпекулации и непроверени наводи кои не се потврдени, се нанесува, како што велат од МНР, лична штета кон човекот, кон неговото семејство, и неговите блиски; со ова однесување ВМРО-ДПМНЕ не само што го изгуби човечкиот компас, туку и директно ѝ нанесува штета на дипломатијата и на односите со пријателска земја како што е Јапонија.
Од ВМРО-ДПМНЕ претходно беше истакнато дека амбасадорот во Јапонија извршил сексуално вознемирување врз повеќе жени за што бил пријавуван неколкупати.
„Личниот пријател на Никола Димитров, а особено близок на претседателот Пендаровски и амбасадор на Република Македонија во Јапонија и на Бујар Османи, Горан Цеков, извршил сексуално вознемирување врз повеќе жени за што е пријавуван неколкупати“, вели пратеничката на ВМРО-ДПМНЕ, Ласовска.
Јапонската државјанка го пријавила Цеков во неколку наврати, но она што е уште повознемирувачко е што тој амбасадор истовремено сексуално нападнал и своја колешка од ДКП во Јапонија за што било алармирано во МНР неколкупати, но никој не презел ништо! Амбасадорот е вратен во земјата, но поминува само со мерка враќање назад“, вели праетничката.
„Во сериозни држави, каде што не владеат антидржавни ентитети како СДС и ДУИ, вакво тешко дело најмалку се казнува со одземање на амбасадорското звање, престанок на работниот однос во МНР, оставка на министерот и хиерархиски казни за сите што молчеле три месеци за нападот врз жените“, изјави таа.
Пратеничката упати клучни прашања до власта:
1. Дали скандалот е прикриван неколку месеци поради неговите лични релации со претседателот Пендаровски?
2. Дали на Цеков ова му е прв ваков сексуален напад?
„Во согласност со законските прописи, сексуалното вознемирување е кривично дело и овој господин треба и кривично да одговара“, додаде таа и побара од Бујар Османи да ги изнесе јавно сите детали од извештајот за дисциплинската комисија, каде што се наведени сите детали за овој чин.
