Уште се чека за официјални резултати од изборите во САД, а додека се чека потврда дали Џо Бајден дефинитивно е новиот претседател на најмоќната држава во светот, стигнуваат различни реакции од целиот свет.
Иако сѐ поизвесно е дека Џо Бајден ќе стане новиот претседател, неизбежно се поставува прашањето - дали Трамп ќе ја предаде власта мирно и што носи победата на Бајден?
Изборниот штаб на актуелниот американски претседател Доналд Трамп најави дека ќе покренат судска постапка со цел да го прекинат процесот за проверка на изборните резултати во сојузната држава Мичиген.
Во исто време, демократите објавија дека еден наводен сведок на „местење“ на изборните резултати во државата Пенсилванија, ги повлекол обвинувањата, објави Reuters.
Републиканскиот правен советник Мет Морган рече дека од судот било побарано да ја прекине верификацијата на резултатите од изборите во Мичиген се додека не се утврди со сигурност дека гласањето е спроведено во согласност со законот.
Демократската партија доцна синоќа обезбеди мнозинство во Претставничкиот дом на САД со најмалку 218 освоени места на изборите одржани на 3 ноември, пренесува Associated Press.
Додека демократите би можеле да освојат уште неколку места во долниот дом на Конгресот, нивното мнозинство ќе биде помало отколку во претходното свикување.
Според пресметките на американската новинска агенција, демократите може да изгубат 15 места во тоа тело, кое брои 435 члена, по големиот прилив на републикански гласови.
Демократите досега имаа 232 места во Претставничкиот дом.
Иако демократот Џо Бајден победи на претседателските избори, постојат големи шанси Републиканците да го задржат мнозинството во Сенатот, пишува Associated Press.
„Во јануари, ќе соработуваме брзо со Конгресот за драматично зголемување на здравствената заштита, за да ја доведеме Америка до универзална покриеност и да ги намалиме трошоците за здравствена заштита“, напиша Бајден синоќа.
