Колумбија ја започна почетната фаза на подводна експедиција за истражување на шпански воен брод кој потона на Карибите пред повеќе од 300 години.
Експертите веруваат дека потонатиот брод содржи артефакти вредни милијарди долари.
Колумбиските власти тврдат дека во 2015 година откриле брод недалеку од брегот на Картагена. Оттогаш, остатоците од потонатиот брод „Сан Хосе“ често се нарекуваат „светиот грал на бродоломите“, пренесува CNN.
Бродот со 62 топа и три јарбола – водечки брод и најголемата галија на шпанската флота - се верува дека носел злато, сребро, смарагди и други вредни стоки од рудникот Потоси во Перу. Колку што е познато, потонал на 8 јуни 1708 година за време на битката со Британија. Во тоа време на него имало околу 600 луѓе.
За време на првата фаза од експедицијата, експертите ќе се фокусираат на фотографирање на бродот, соопшти Колумбискиот институт за антропологија и историја (ICANH), додавајќи дека подоцна би можеле да се обидат да добијат археолошки артефакти.
ICANH го прогласи локалитетот за национално заштитено археолошко наоѓалиште за „да се зачува неговата научна и археолошка вредност“. За време на експедицијата, планираат да користат подводен брод со акустични уреди за позиционирање, како и далечински управуван што може да се спушти до длабочината каде што се наоѓа потонатиот брод.
Откривањето на „Сан Хосе“ е значајно за Колумбија поради културните и историските артефакти кои би можеле да обезбедат поголем увид во европската економска, социјална и политичка клима во текот на почетокот на 18 век. Но, тоа доведе и до правна битка од повеќе милијарди долари. Имено, Колумбија наведува дека го открила „Сан Хосе“ во 2015 година со соработка на меѓународни научници.
Нејзините тврдења се оспорени од американската компанија Sea Search-Armada (SSA), која тврди дека била првата што го пронашла потонатиот брод во раните 80-ти.
SSA започна правна битка против колумбиската влада пред арбитражен суд, тврдејќи дека има право на 10 милијарди долари; што е околу половина од проценетата вредност на богатството на потонатиот брод. Колумбиската влада ги оспорува наводите на SSA.