Фудбалерите на Реал Мадрид го претрпеа првиот пораз сезонава и тоа на доста болен начин, губејќи од лутиот градски ривал Атлетико со 3:1, а целата вина по овој неуспех ја презеде тренерот Карло Анчелоти.
Италијанскиот стратег признава дека неговиот тим не изгледал онака како што требало и не бега од тоа дека тој морал да направи повеќе за да не дошло до таква ситуација.
Всушност, тимот од „Сантјаго Бернабеу“ и во натпреварот од Лигата на шампионите против Унион Берлин изгледаше бледо, но тогаш се извлече во судиското надополнување за минимална 1:0 победа.
„Кога губите со 3:1 од градскиот ривал, тогаш е сосем нормално како тренер да преземете одговорност. Тоа е најмалку што можам да направам. За ова виновни не се играчите, туку е мој неуспех. Така треба да се гледа на ситуацијата“, изјави по натпреварот искусниот предводник на мадриѓаните.
„Примивме слични голови, а тоа не смее да ни се случува. Многу слабо влеговме во натпреварот, некако недоволно подготвени, а тим каков што е Атлетико такви работи знае да ги казнува. Го покажаа целиот квалитет и сосем заслужено успеаја да остварат важна победа бидејќи целиот натпревар беа подобри од нас и тоа треба да се признае“, истакна Анчелоти.
Реал веќе в среда има нов дуел од Ла Лига кога дома од 19 часот ќе го пречека Лас Палмас.