Репрезентацијата на Англија го совлада кодомаќинот на женскиот Мундијал и се избори за финале против Шпанија.
За прв пат во својата историја женската репрезентација на Англија ќе игра мундијалско финале, откако попладнево со 3:1 ја совлада еуфоричната Австралија.
Англичанките поведоа во 36. минута со голот на Ела Тун, која ги замолкна 75.784-те гледачи на преполниот стадион „Олимпик“ во Сиднеј. Со тој резултат се замина и на пауза.
Во вториот дел во 64. минута капитенката на домашните, Саманта Кер, со удар од 25 метри израмни на 1:1 и ја врати Австралија во игра.
Меѓутоа, само седум минути подоцна нов молк во Сиднеј. Англичанките по вторпат ја пробија австралиската одбрана и погодија преку Лорен Хемп. Победата и пласманот во големото финале ги потврди Алесиа Русо на четири минути пред крајот, оставајќи ги Австралијките во солзи.
Така, Англија против Шпанија ќе се обиде на титулата европски шампионки да ја додаде и светската. Англија на последните два Мундијала губеше во полуфиналето.
Шпанија синоќа во Окленд, Нов Зеланд ја победи Шведска со 2:1 и исто така за прв пат избори финале.
Големото финалето ќе се игра в недела во Сиднеј со почеток во 12 часот по македонско време. Пренос ќе врши МРТ.
Англија до финалето стигна елиминирајќи ги Нигерија (1:0), Колумбија (2:1) и Австралија (3:1), додека Шпанките ги совладаа Швајцарија (5:1), Холандија (2:1) и Шведска (2:1). Претходно во фазата по групи Англичанките беа први со перфектен скор против Данска (1:0), Кина (6:1) и Хаити (1:0), додека Шпанија беше втора откако загиби од Јапонија (0:4), а ги совлада Замбија (5:0) и Костарика (3:0).
