Легендарниот француски напаѓач Тјери Анри смета дека Лео Меси треба повеќе да игра на средината отколку на десното крило, како одговор на прашањето зошто поранешниот играч на Барселона нема ниту гол ниту асистенција во француската Лиг 1.
Меси досега има одиграно 4 натпревари во Лиг 1, а на теренот помина вкупно 280 минути. Сепак, на четирите натпревари не успеа да постигне гол или асистенција, а во Лигата на шампионите постигна 3 гола.
ПСЖ ремизираше против Марсеј на гости без гол на последниот првенствен натпревар завчера, а на новинарско прашање зошто Меси е неефикасен во Лиг 1, легендарниот Анри даде свое објаснување.
„Тој е изолиран, помалку се гради, помалку ѝ приоѓа на топката... Топката сѐ помалку му е во нозете. Не велам дека е тажен, туку изолиран од играта. Јасно е дека има проблеми на десната страна. Мора да најдат многу подобар начин за Меси, Нејмар и Мбапе да играат заедно“, рече Анри.
„Треба да игра повеќе во средината, сакам да го видам таму. Треба да биде играчот кој го поставува темпото на играта“, додаде.
Следниот натпревар ПСЖ го игра против актуелниот шампион Лил на домашен терен, а потоа ќе игра против Лајпциг во Лигата на шампионите. До репрезентативната пауза остануваат да играат уште против Бордо на гости, а потоа по паузата ќе го имаат дуелот против Нант кој е закажан за 20 ноември.