Машката фудбалска репрезентација на Бразил нема да ја брани титулата олимписки победник летово во Париз. Имено, во решавачкиот натпревар од последното 3. коло од последната група на јужноамериканскиот квалификациски турнир што се игра во Венецуела, Бразил загуби со 0:1 од најголемиот ривал - Аргентина.
Стрелец на единствениот гол за аргентинската репрезентација до 23 години, предводена од Хавиер Масчерано, беше Лусиано Гондо во 77. минута.
Аргентина го заврши натпреварувањето во финалната група на второто место со 5 бода, додека Бразил остана трет со 3 бода.
Заедно со Аргентина, јужноамерикански претставник на Олимписките игри во Париз ќе биде Парагвај, кој во последниот натпревар на турнирот го совлада домаќинот Венецуела со 2:0 и со тоа го освои првото место со 7 бода. Венецуела, пак, остана последна во групата со само бод.
Покрај златото освоено пред три години во Токио, Бразил освои и злато на домашен терен во 2016 година во Рио де Жанеиро, а ова е првпат по 2004 година да не се пласираат на Олимпијадата. Аргентина, пак, ја освои титулата олимписки победник во фудбал во Атина во 2004 година и во Пекинг во 2008.