Археолози велат дека парче карпа старо 4.000 години со мистериозни ознаки е нивната „мапа до скриено богатство“ бидејќи обезбедува еден вид водич за скриените древни места низ Северозападна Франција.
Во 2021 година, научниците ја прогласија плочата Сен-Белек за најстарата мапа во Европа и оттогаш се обидуваат да ги дешифрираат нејзините гравури.
„Користењето мапа за пронаоѓање археолошки локалитети е одличен пристап. Ние обично не го правиме тоа“, рече археологот Иван Паје од Универзитетот во Западна Бретања (УБО) во Франција. Имено, археолозите најчесто дознаваат за скриените локации преку радарски снимки, снимки од воздух или случајно, при градежни работи. „Тоа е мапа до скриено богатство“, рече Паје.
Оваа древна „мапа“ покажува област со големина приближно 30 на 21 километар, а колегата на Паје, Клеман Никола, од францускиот Национален центар за научни истражувања (CNRS), вели дека археолозите ќе мора да ја истражат целата територија и да ги споредат ознаките на плочата. Тој додава дека оваа работа би можела да трае 15 години.
Никола и Паје беа дел од тимот кој повторно ја откри плочата во 2014 година. Првично беше откриена во 1900 година од локален историчар кој не ја разбрал нејзината вистинска важност. На француските експерти им се придружија колеги од други институции во Франција и странство и тргнаа да ја откријат мистеријата на древната карпа, пишува AFP.
„Имаше неколку врежани симболи кои веднаш добија смисла“, рече Паје. Имено, во грубите гребени и линии на плочата, тие можеа да ги погледнат реките и планините на Рудуалек, дел од Бретања. Археолозите ја скенирале карпата, ја споредиле со модерните мапи и пронашле приближно 80% совпаѓање.
„Ние сè уште треба да ги идентификуваме сите геометриски симболи, легендата што оди со нив“, вели Никола.
На плочата има мали вдлабнатини, за кои научниците веруваат дека може да претставуваат гробни могили, живеалишта или геолошки наоѓалишта. Откривањето на нивното вистинско значење може да доведе до цела поплава од нови откритија. Имено, областа што ја покрива оваа „мапа“ веројатно припаѓа на древно кралство од бронзеното време.
