Откако се ослободи од Озил, Арсенал веднаш донесе нов играч, барем за остатокот од сезоната.
Норвешкиот фудбалер Мартин Одегард (всушност правилниот изговор е Едегор) доаѓа во Арсенал како позајмен играч од Реал Мадрид. Доаѓа на шест месеци и треба на тимот да му донесе креативност.
Самиот Одегард побара од Реал Мадрид да си замине зимава бидејќи беше незадоволен од малата минутажа која ја имаше кај Зинедин Зидан. Во Ла Лига одигра само 7 натпревари со вкупна минутажа од 232 минути. Настапи и двапати во Лигата на шампиони.
Одегард е во Реал уште од 2015 година кога дојде од Стремсгодсет како надежен тинејџер, но не ги оправда очекувањата. Ова е четврти пат како е позајмуван, претходно беше праќан во Хееренвеен и Витесе, а ланската сезона ја мина во Реал Сосиедад.
Токму тимот од Сан Себастијан сакаше повторно да го донесе на позајмица, но Норвежанецот открива дека Микел Артета бил клучниот фактор поради кој го одбрал Арсенал.
„Зборував со него пред да дојдам тука. Тоа беше многу важно за мене, ми делува како топ тренер, ми се допаднаа неговите идеи, начинот на кој го гледа фудбалот и начинот на кој се однесува. Навистина ми остави голем впечаток и тоа беше клучно за мене да дојдам тука“, рече Одегард по пристигнувањето во Лондон.
Тој за „Топчиите“ ќе настапува во дресот со бројот 11, дрес кој го носеле великани како Марк Овермарс и Робин ван Перси, а го носеше и Месул Озил пред да го смени со десетката.
