Габонскиот голгетер останува без честа да биде капитен на „Топчиите“ откако клубот одлучи да му ја одземе лентата поради прекршување на клупските правила за дисциплина.
Пјер-Емерик Обамејанг беше изоставен од тимот за натпреварот против Саутемптон од минатиов викенд, па одлуката за одземање на капитенската лента е и очекувана.
„Со оглед на последниот дисциплински испад минатата недела, Пјер-Емерик Обамејанг нема повеќе да биде наш капитен и нема да биде во составот за натпреварот в среда против Вест Хем Јунајтед. Од сите наши играчи, особрено од капитенот, очекуваме да ги почитуваат правилата и стандардите кои сите ние сме ги поставиле и со кои сме се согласиле“, стои во клупското соопштение.
Тренерот Микел Артета отркри дека Обамејанг бил изоставен од натпреварот викендов откако задоцнил враќајќи се од патување.
„За жал тој не е во игра поради дисциплински причини. Ситуацијата не е лесна и не е нешто во кое сакаме нашиот капитен да биде вовлечен. Но, сите сме сложни дека постојат работи за кои не се дебатира во тимот и според кои сме се поставиле како клуб и поради тоа се случи ова“, вели Артета.
Арсенал нема среќа со капитените во последно време. Обамејанг беше назначен за нов капитен на 19 ноември откако поради низата скандали лентата му беше одземена на Швајцарецот Гранит Џака, против кого се свртеа и самите навивачи.
На последниот натпревар честа на раката ја доби Александр Лаказет, но прашање е дали тој ќе биде нов капитен со оглед на тоа што договорот му истекува и сѐ уште нема најави дека ќе го продолжи. Можеби со доделувањето на капитенската лента управата ќе го направи последниот чекор во обидот да го задржи Французинот.