Баскискиот стратег негира дека постои веројатност да седне на клупата на каталонскиот тим и тврди дека е пресреќен во Арсенал.
Микел Артета уште на 15 години ја напушти родната Баскија и дојде во младинската академија на Барселона. Но, за првиот тим никогаш не заигра, а дури 11 сезони мина во Премиер лигата играјќи за Евертон и за Арсенал, каде и се пензионираше.
„Секогаш кога има избори во Барселона ќе има и вакви шпекулации. Тоа е огромен клуб“, вели Артета.
Шпекулациите велат дека доколку Жоан Лапорта биде избран за претседател на претстојните избори, ќе го замени Роналд Куман со Микел Артета.
„Нормално, јас таму израснав како играч и затоа секогаш ќе има поврзаност. Но, јас сум целосно фокусиран на работата која треба да ја вршам овде, а имаме и тоа како работа и навистина уживам во тоа“.
Артета седи на клупата на „Топчиите“ од 20 декември 2019 година.
„Денес и утре сум тренер на фудбалскиот клуб Арсенал и уживам во тоа. И сакам да направам многу повеќе од ова што сум го направил до сега. Она што можам да го кажам е дека се чувствувам привилегиран што го водам овој клуб и дека сум екстремно среќен“, заврши тој на оваа тема.
