Американскиот претседател Џо Бајден предупреди вчера дека ако Русија ја нападне Украина нема да биде ништо од Северен поток 2, но не појасни како ќе осигура дека контроверзниот гасовод нема да се користи.
Говорејќи на заедничката прес-конференција со германскиот канцелар Олаф Шолц, Бајден рече:
„Ако Русија нападне... повторно, нема да биде ништо од Северен поток 2. Ќе биде готово“. На прашањето како ќе го обезбеди тоа, тој одговори: „Ветувам дека ќе можеме да го направиме тоа“.
Најконтроверзниот енергетски проект во Европа, Северен поток 2, го изгради рускиот енергетски гигант Газпром за да ја удвои количината на гас од Русија до Германија, заобиколувајќи го традиционалниот транзит низ Украина.
Пред средбата, добро упатени извори изјавија дека Бајден јасно ќе му каже на Шолц дека „Северен поток 2“ не треба да биде пуштен во употреба доколку „Русија на каков било начин ја нападне Украина“. Германија, која покрива половина од потребите за гас од рускиот пазар, го одложи одобрувањето на гасоводот најрано до втората половина на 2022 година, но го отфрли целосното откажување на проектот.
Американскиот претседател нагласи и дека сѐ уште има простор за дипломатија со Русија. Бајден и сојузниците на САД ја предупредија Русија дека ќе се соочи со економски санкции доколку ја нападне Украина.
Шолц рече дека Германија е подготвена да продолжи да обезбедува големи суми средства за економската стабилизација на Украина. „Ние даваме многу, многу голема финансиска поддршка на Украина“, рече Шолц, објаснувајќи дека Германија и дала околу 2 милијарди долари на земјата. „Ние ќе продолжиме да го даваме тој придонес“, додаде тој.
Шолц, кој беше критикуван во Германија и во странство за неговата недоволна вклученост во актуелната криза, им рече на новинарите пред состанокот во Белата куќа дека Русија ќе плати многу висока цена доколку ја нападне Украина. Шолц следната недела ќе ги посети и Украина и Русија, додека оваа недела се сретна со претседателот на Европскиот совет и со лидерите на балтичките земји.
Односот меѓу Бајден и Шолц е важен во кризата и затоа што францускиот претседател Емануел Макрон сѐ уште официјално не ја објавил својата кандидатура на претстојните избори во април, додека британскиот премиер Борис Џонсон е среде домашна политичка криза.