Барселона заигра под водство на Чави Ернандес и моментално изгледа како да излегува од резултатската криза во која се наоѓа подолго време.
Некои тврдат дека овој период трае веќе три години, а некои дека почнал со заминувањето на Меси, но сега се чини дека дефинитивно му дошол крајот.
Доведувањето на Пјер-Емерик Обамејанг, Адама Траоре и Феран Торес се покажа како одличен потег бидејќи Барселона по зимската пауза повторно почна да постигнува голови и убедливо да ги победува противниците. Сепак, сè уште има проблематични делови од тимот, а Каталонците сега имаат план за нив.
Се гради нова Барселона
AS пишува дека Каталонците ќе се ослободат од дури осум играчи, а на списокот за отпис летово ќе се најдат Нету, Сержи Роберто, Клемен Ленгле, Самуел Умтити, Оскар Мингеса, Рики Пуџ, Мартин Брејтвејт и Лук де Јонг.
Нивните заминувања треба да овозможат во клубот да дојдат веќе договорените Франк Кесие од Милан и Андерс Кристенсен од Челси, како и едно големо име во нападот. Најспомнувани се Мохамед Салах и Ерлинг Холанд.