Фудбалерите на Барселона го победија Реал во првиот полуфинален натпревар од Купот на кралот на стадионот Сантијаго Бернабеу со резултат 1:0 и со тоа стекнаа солидна предност во пресрет на реваншот што ќе се игра на „Камп Ноу“ следниот месец.
Реал веднаш се закани уште во првата минута преку Модриќ, а во 12. Бензема успеа да постигне гол по асистенција на Винисиус, но голот оправдано беше поништен поради офсајд.
Во првите 20 минути видовме многу малку од Барселона, а потоа по речиси половина час игра успеаја да поведат. Кесие шутираше, Куртоа одбрани, а топката од Милитао влезе во голот. Прво беше означен офсајд за Кесие, но по прегледот на ВАР, одлуката беше сменета. До крајот на првото полувреме немаше повеќе големи возбудувања, па првото полувреме заврши со водство на Барселона од 1:0.
Реал доминираше во вториот дел, имаше голем број на опасни напади, но за разлика од претходните изданија, никогаш не успеа да дојде до чисти шанси за гол.
Од друга страна, Барселона се концентрираше на контранапади, па можеше да го удвои водството во 72. минута. Торес одигра заден пас за Кесие чиј шут беше одбиен од неговиот соиграч Фати.
До крајот на мечот Реал се обидуваше да израмни, но синоќа едноставно не им одеше. Тоа го поткрепува и фактот дека не упатија ниту еден удар во рамката од голот, со што Барселона поведе во овој двомеч од Купот на кралот.
Реваншот меѓу Барселона и Реал ќе се игра на Камп Ноу на 5 април, а овие два ривали во меѓувреме ќе ги одмерат силите и во Ла Лига. Таа средба е закажана за 19 март.
