Скопје и скопјани по 16-ти пат, в сабота на 26 септември, ќе можат да бидат дел од Бела ноќ, градскиот културен настан кој стана традиционален.
Една недела порано од вообичаеното, на 10 локации (паркингот пред СРЦ „Борис Трајковски“, МКЦ, Зелено пазарче, плоштад „Ибни Пајко“, Музеј на современа уметност, Дом на култура „Кочо Рацин“, Архитектонски факултет, Градска библиотека „Браќа Миладиновци“ и Даут Пашин Амам), посетителите ќе можат да ги погледнат перформансите, концертите, изложбите и другите културно-уметнички активности.
Бела ноќ, во организација на Универзалната сала, со поддршка на Град Скопје, на граѓаните со својот урбан концепт ќе им ја доближи уметноста, додавајќи и нова, културна димензија.
Годинава централниот настан „Скопските евергрини“ ќе се одржи на паркингот пред СРЦ „Борис Трајковски“, каде што најпознатите скопските хитови ќе бидат изведени од најголемите македонски музички ѕвезди како Влатко Стефановски, Тамара Тодевска, Јаков Дренковски, Дарио и други, во придружба на „Баги Биг Бенд“, под диригентската палка на Љупчо Мирковски.
Влезниците за „Скопските евергрини“ пред СРЦ „Борис Трајковски“ и концертот на платото пред МКЦ, се бесплатни и истите можат да се подигнат на билетарите на МКЦ и на Универзална сала.
Со почитување на мерките и препораките на Министерството за здравство и Град Скопје за заштита од пандемијата од коронавирусот, настаните од Бела ноќ в сабота ќе започнат од 19:00 часот и ќе траат до 24:00 часот, работното време на локалите нема да биде продолжено после 24:00 часот, нешто што беше вообичаено за минатите Бели ноќи, а граѓаните за локациите и програмата дополнително можат да се информираат и на официјалната веб-страница како и на настанот на Facebook.
