Приватните превозници во Скопје велат дека сите обвинувања кои вчера ги изнесе градоначалничката Данела Арсовска во врска со нивната работа не се точни.
Велат дека Арсовска од некого добива дезинформации штом изнесува вакви податоци во јавноста и затоа бараат итна средба со неа за да ѝ објаснат како стојат работите со јавниот превоз.
Приватните превозници од вчера не возат на градските линии 9,12, 23 и 45 затоа што Градот не им го подмирил долгот од еден милион евра.
Бараат состанок со Арсовска за да ги претстават нивните аргументи и ќе бараат ЈСП да им го исплаќа долгот. Во спротивно, доколку нема слух од Град Скопје, тогаш се заканија со поригорозни чекори, меѓу кои е и блокирањето на градските улици.
Претседателот на „Слобода превоз“ – Ленин Јовановски се закани дека парите од ЈСП ќе ги бараат и преку тужба до ЈСП и директорот на претпријатието. Според пресметките на „Слобода превоз“, ЈСП им должи околу еден милион евра, фактура која ќе се зголеми до почетокот на декември, а „Макекспрес“, според нивните пресметки, има за наплата околу половина милион евра.
„Арсовска вели дека најважен ѝ бил јавниот интерес. Е па, без нас јавниот интерес нема да постои оти граѓаните ќе останат без превоз. Без нас нема да има редовен превоз оти ЈСП ‘Скопје‘ нема доволно автобуси да ги замени сите линиите на кои ние возиме. Ако Арсовска не закаже средба со нас значи дека нема волја од нејзина страна да се реши ова прашање“, рече Ленин Јовановски, директор на „Слобода превоз“, пренесе СДК.мк.
