Баскијците синоќа го совладаа лидерот Атлетико и ги вратија во игра за титулата великаните Барселона и Реал Мадрид.
Ла Лига е пред луда завршница откако Атлетик синоќа триумфираше над мадридски Атлетико нанесувајќи му го четвртиот сезонски пораз на лидерот на табелата.
Уште во 8. минута Алехандро Беренгер го најави изненадувањето во Билбао. Гостите од престолнината ја бркаа негативата и конечно ја ликвидираа на 13 минути пред крајот кога Стефан Савиќ израмни.
Сепак, во 86. минута нов суден туш за тимот на Диего Симеоне откако Ињиго Мартинес го постигна победничкиот гол за Баскијците.
Реал Мадрид, фактички, во саботата пропушти шанса да се израмни со Атлетико на врвот откако одигра без голови дома со Бетис. Затоа, пак, Барселона синоќа го совлада Виљареал на гостински терен со 2:1 благодарение на двата гола на Антоан Гризман откако домашните први поведоа.
Во игра за титулата влезе и Севиља која е четврта, но со само три бода заостанување зад лидерот Атлетико. Синоќа Андалузијците со 2:1 ја совладаа Гранада со головите на Иван Ракитиќ и Лукас Окампос.
Табела:
- Атлетико 73
- Реал Мадрид 71
- Барселона 71
- Севиља 70
Барселона има и натпревар помалку.
