Дубаи стана прибежиште за богатите Руси кои бегаат пред санкциите воведени од Западот, поради војната во Украина.
Руски милијардери и претприемачи пристигнуваат во Обединетите Арапски Емирати (ОАЕ), изјавија бизнисмени за BBC.
Купувањето имот во Дубаи од Руси се зголемило за 67 отсто во првите три месеци од 2022 година. ОАЕ не воведоа санкции кон Русија и не ја критикуваа нејзината инвазија на Украина.
Абу Даби издава визи за Русите кои не подлежат на санкции, наспроти ограничувањата воведени од многу од западните држави. Се проценува дека стотици илјади луѓе ја напуштиле Русија во изминатите два месеци, иако нема точни бројки.
Руски Економист изјави дека 200.000 Руси ја напуштиле земјата во првите десет дена од почетокот на војната.
Агенцијата „Virtuzone“, којашто им помага на компаниите да започнат бизнис во Дубаи, бележи огромен прилив на руски клиенти.
„Од почетокот на војната, добивме пет пати повеќе барања од Русите“, изјави извршниот директор Џорџ Хоџи. „Тие се загрижени за претстојниот економски колапс. Затоа се селат овде, за да го зачуваат нивното богатство“, вели тој.
Приливот руски граѓани ја зголеми побарувачката за луксузни вили и станови низ градот. Агенциите за недвижности известуваат за нагло зголемување на цените на недвижностите во мигови кога расте бројот Руси кои пристигнуваат во Дубаи и бараат да купат станбени објекти. Агенцијата за недвижности „Betterhomes“, со седиште во Дубаи, објавуви дека во првите три месеци од 2022 година трипати е зголемен бројот на купувања недвижен имот од страна на руски државјани.
