Алберт Ајнштајн, нобеловец и светски познат физичар, кој денес голем дел од светот го смета за генијалец, бил тежок човек, чуден, екцентричен и со „бубачки“ во главата.
Неговата прва сопруга Милева Мариќ го знаела ова подобро од сите.
Милева Мариќ и Алберт Ајнштајн се запознале за време на нивните студии. Што ја привлекло перспективната, паметна и четири години постара студентка кај тивкиот, недружељубив и повлечен студент кој ретко зборувал, немал пријатели и речиси секогаш седел сам, денес не е познато. Меѓутоа, пред да го заврши факултетот, Милева забременила и ја родила вонбрачната ќерка Лизерл.
Алберт и Милева се венчале во Берн на 6 јануари 1903 година. Некое време пред свадбата, Лизерл се разболела од шарлах. Не е познато дали починала или е дадена на посвојување. Кога Милева му се придружила на Алберт во Берн, детето не било со неа.
Мајката на Ајнштајн наводно никогаш не ја сакала Милева. Ѝ пречела разликата во години, тоа што ја задржала православната вера и што едната нога ѝ била пократка од другата. Постојано вршела притисок врз синот, а притисокот со годините станал посилен и откако Милева родила два сина.
Нивниот брак функционирал по строго дефиниран „режим“ - Алберт поминувал шест дена во неделата во патентниот завод, слободното време го посветувал на физика, а Милева се трудела да ги образува децата и да ја води куќата. Со текот на времето, таа целосно ја запоставила својата научна работа.
Бракот со години бил во криза, со подобри и полоши периоди, а научникот сè повеќе време поминувал со својата љубовница - братучетката Елза Ловентал. По една од најлошите расправии, Алберт на Милева ѝ направил „список со правила“ кои тој очекувал таа да ги следи:
„Ќе водиш сметка:
да бидат одржувани мојата облека и постелнина;
да добивам три редовни оброци во мојата соба;
мојата спална соба и работна соба да бидат уредни и особено мојата маса да се користи само за мои потреби.
Ќе се откажеш од сите лични врски со мене, освен ако тие не се неопходни од социјални причини. Поточно, ќе се откажеш од:
тоа да седам во куќата со тебе;
да излегувам и да патувам со тебе.
Ќе ги почитуваш следниве правила во врска со мене:
нема да очекуваш никаква интимност од мене, ниту ќе ми приговараш;
ќе престанеш да разговараш со мене ако тоа го побарам;
ќе ја напуштиш мојата спална соба и работна соба ако тоа го побарам веднаш и без приговор.
Ветуваш дека нема да ме омаловажуваш пред нашите деца, ниту со зборови, ниту со однесување.“
Не се знае колку долго живеела Милева по овие диктати. Во јули 1914 година, ден пред Првата светска војна, конечно ѝ дошло преку глава. Си ги спакувала работите, го оставила Ајнштајн и со децата отишла во Цирих.
Научникот побарал развод дури во 1916 година, кој бил легализиран во 1919 година. Тие официјално се разделиле на 14 февруари 1919 година, а Алберт се оженил со Елса на 2 јуни 1919 година.
Списокот со „барањата“ беше откриен во едно од писмата на Алберт до Милева, а беше објавен во биографијата „Ајнштајн - неговиот живот и универзум“ напишана од Волтер Ајзаксон, некогашен претседател на CNN и главен уредник на магазинот Time.
