Високиот домашен пораз од Гризија ја чинеше македонската фудбалска репрезентација пад од две места на најновата ранг- листа на ФИФА на која и натаму лидер е Бразил, а во топ 3 влезе Аргентина.
Македонските фудбалери одиграа 4 натпревари изминатиот период и забележаа 2 победи (2:0 и 4:0), но и двете против слабиот Гибралтар. Ремизираа 1:1 со Бугарија, репрезентација која исто така има послаб рејтинг од нас, а загубија со високи 3:0 среде Скопје од Грузија, уште една послаборангирана репрезентација. Оттаму и нашиот рејтинг назадуваше, имаме 5,87 поени помалку од априлскиот рејтинг и паднавме две места, па сега сме на 64. место.
На врвот и натаму лидер е Бразил, пред Белгија, додека има промена на 3. место. Во топ 3 сега се најде Аргентина која ја истисна Франција благодарение на лошите резултати на Французите. А, пак, во топ 10 се врати Германија на сметка на Мексико.
Најголем скок на јунскиот ранкинг забележа Казахстан кој рипна 11 места, но и натаму е над стотката (114. место). Казахстанците изненадија многумина со двете победи над Словачка, па поради тоа собраа и најмногу поени од сите - 31,51. Добар скок запиша и Куба која се искачи 10 позиции и сега е на 167. место.
Најголем пад запишаа Египет (40. место) и Непал (176.) кои назадуваа за 8 места, додека најмногу поени загуби Мјанмар, дури 32,65 (158. место).
