Британскиот професор по медицина на Универзитетот Ливерпул и член на советодавното тело за итни ситуации, Калум Симпл оцени дека новиот сој на коронавирус, кој се шири низ Велика Британија, најверојатно ќе стане доминантен во целиот свет.
Тој истакна дека новиот сој има предност стекната со еволуирање побрзо да се шири кај човечката популација, па на тој начин ќе ги потисне другите соеви на коронавурус и природно ќе стане доминантен, пренесе Guardian.
„Колку повеќе ќе се зголемува стекнатиот колективен имунитет, толку ќе биде поизвесна појавата и развојот на новите соеви на коронавирус. Тоа не е изненадување за нас бидејќи секоја година се бориме со вирусите“, укажа професорот Симпл.
Новиот сој на коронавирусот, регистриран во Велика Британија, се појави и во Холандија, Данска и Австралија, а според последните податоци и во Италија и во Јужна Африка.
VUI-202012/01 (Variant Under Investigation, year 2020, month 12, variant 01) е името што научниците го дадоа на новата мутација на коронавирусот SARS-CoV-2, кој од вчера предизвика континуиран бран на затворање на границите во Европа за воздушните врски со Велика Британија.
Поради вирусот, најмалку 16 милиони луѓе во југоисточна Англија се во карантин.
