Со оглед на тоа што ограничувањата поради коронавирусот станаа минато, бројот на официјално регистрирани проститутки во Германија се зголеми на 28.280 во 2022 година, што е зголемување за 19% во однос на претходната година, објави Федералниот завод за статистика.
„Причината за ова зголемување е веројатно целосното укинување какви било ограничувања поврзани со коронавирусот во април 2022 година“, се вели во соопштението.
Според податоците од 2019 година, пред коронавирусот да предизвика широко распространети затворања, 40.370 луѓе биле регистрирани како сексуални работници. Според германскиот Закон за заштита на проститутките од 2017 година, проститутките мора да бидат регистрирани иако илегалните активности сè уште постојат.
Последните податоци покажуваат „значителен пораст на бројот на проститутки од Украина“, соопшти германската канцеларија истакнувајќи дека во 2022 година биле регистрирани 470 украински проститутки во споредба со 180 во 2021 година, што е зголемување за 161%.
Минатата година имало 5.200 сексуални работнички со германско државјанство или 18% од вкупниот број. Најчести странски државјани меѓу нив се Романците, кои сочинуваат 35%, потоа Бугарите – 11% и Шпанците – 6%.
Федералното биро за статистика исто така објави дека бројот на установи за проституција, како што се борделите, се зголемил минатата година, при што 2.310 такви установи имаат лиценца во споредба со 2.290 установи во 2021 година. Нерегистрираните занаети и проститутките не се вклучени во статистиката, велат од Заводот.
