На азиските берзи денеска се тргува внимателно бидејќи нема нови вести кои ќе го поддржат континуираниот раст на пазарот, додека цената на златото достигна рекордни нивоа.
Индексот MSCI на азиско-пацифичките акции, без јапонските акции, порасна за 0,4 отсто околу 19 часот, по силниот раст во ноември.
Утрово на токиската берза индексот Nikkei ослабе за 0,6 отсто, додека цените на акциите во Шангај и Хонгконг се лизнаа меѓу 0,1 и 0,4 отсто. Во Јужна Кореја и Австралија, пак, тие се зголемија меѓу 0,5 и 0,7 отсто.
По силниот скок на цените на акциите во ноември, инвеститорите се повнимателни на почетокот на декември.
Најновите податоци покажуваат дека кинеската економија не расте толку брзо како што се надеваа инвеститорите, а проблемите во секторот на недвижности сè уште не се целосно решени.
Поради ова утринава благо паднаа берзанските индекси во Шангај и Хонгконг.
Од друга страна, во Австралија цените на акциите пораснаа бидејќи инвеститорите веруваат дека циклусот на зголемување на стапката е завршен.
Како што инфлацијата постепено се намалува, гувернерите на централните банки на Австралија се очекува да ги остават каматните стапки непроменети на нивниот последен состанок годинава во вторник.
Проценките дека поради намалувањето на инфлаторните притисоци заврши циклусот на зголемувања на каматните стапки во западните земји, претставуваат главен лост на растот на пазарот во последниот месец.
Благодарение на ова, на Волстрит во петокот индексот S&P 500 го достигна највисокото ниво оваа година, што ги поддржува и другите пазари во светот.
И на валутните пазари вредноста на доларот во однос на кошничката валути благо порасна, по минатонеделниот пад.
Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 103,28 поени, додека во петокот навечер изнесуваше 103,19 поени.
Во исто време, курсот на доларот во однос на јапонската валута се лизна од 146,80 на 146,60 јени.
Но, американската валута зајакна во однос на европската, па цената на еврото се лизна на 1,0875 долари, додека во петокот вечерта беше 1,0885 долари.
Цените на нафтата, пак, дополнително паднаа, откако минатата недела се лизнаа за околу 2 отсто.
Цената на барелот на лондонскиот пазар утрово ослабе за 0,70 отсто, на 78,35 долари, додека на американскиот пазар цената на барелот се намали за 0,63 отсто, на 73,60 долари.
Цената на златото, пак, утринава достигна ново рекордно ниво, втор ден по ред, бидејќи инвеститорите го насочуваат својот капитал кон побезбедни инвестиции, со оглед на геополитичките ризици, слабоста на економиите и слабеењето на долар.
Цената на унца злато утрово за прв пат во историјата се искачи над 2100 долари.