Фронтменот на „Ролинг стоунс“ Мик Џегер завчера неочекувано објави нов сингл, „Eazy Sleazy“, со кој го прослави завршувањето на локдаунот во Велика Британија.
Во песната, легендарниот британски рокер ги исмева негативните последици од животот дома за време на пандемијата.
„Се обидувам да напишам мелодија, подобро поврзи ме на Zoom“ и „премногу телевизија, тоа ми прави лоботомија“, се некои од стиховите на новата песна на Џегер.
Џегер, кој ја напишал песната пред неколку недели, се здружи виртуелно со гитаристот на „Фу фајтерс“, Дејв Грол.
„Тоа е песна што ја напишав за излегување од локдаун, со оптимизам што ни е многу потребен“, рече 77-годишниот Џегер.
„Целта ми е да ги отфрлам работите за кои пеам во стиховите. Станува збор за транзиција во, се надевам, пооптимистична состојба на умот“, додава тој.
Затоа Џегер во песната порачува: „Ќе побегнеме од овие затворски ѕидови“ и дека тоа ќе биде „ градина на земните задоволства“.
Пабовите во Велика Британија почнаа со послужување пијалоци на отворено во понеделникот, додека продавниците исто така отворија како дел од ублажувањето на локдаун мерките во земјата по три месеци „под клуч“.
Грол рече дека снимањето на песната со Џегер било „повеќе од остварување на сонот“.
„Баш кога мислев дека животот не може да стане пооткачен. Тоа е несомнено летен хит", додаде тој.