Чешкиот голман Петр Чех е лут поради новите ВАР правила за изведување пенали со кои маки мачат голманите ширум светот, па се огласи на Instagram по ова прашање.
„Како може еден голман да покрие површина од 7 метри и 32 сантиметри ширина и 2 метри и 44 сантиметри висина, без да се помести од линијата, додека некој шутира на оддалеченост од 11 метри со просечна брзина на топката од 112 километри на час, што значи дека на топката ѝ требаат 0, 35 секунди да ја помине на гол-линијата? Едноставно не го разбирам форсирањето на тоа правило. Лесно е да се критикува без понудени решенија, па затоа нудам едно. Може ли судијата пред изведувањето на пеналот едноставно да испрска друга гол-линија на одредена оддалеченост од основната гол-линија и голманот да брани во тој простор? Тоа ми изгледа како добра идеја “, напиша 38-годишниот Чех.
За потсетување, најновата „жртва“ на правилото беше Лукаш Фабиански кој мораше да го повтори пеналот на мечот со Лидс бидејќи излезе надвор од гол-линијата.
Фабиански првично го одбрани обидот на Матеуш Клич, но бидејќи не беше со ниту една нога на гол-линијата во моментот кога Клич шутираше кон голот, тој мораше повторно да се врати на линијата. Клич го совлада во вториот обид.
