Ризикот од пренос на коронавирус од површини е низок, а луѓето кои опсесивно ги дезинфицираат површините можеби прават повеќе штета отколку корист. Ова е ставот на американскиот Центар за контрола и превенција на болести, од каде објаснуваат дека е далеку почесто вирусот да се пренесе преку воздух, пренесе CNN.
„Центарот утврди дека ризикот од површинско пренесување е низок, а секундарен во однос на примарните начини на пренесување на вирусот преку директни контакти со заразени капки и аеросоли“, вели Винсент Хил, шеф на одделот за превенција на болести.
Хил на прес-конференција изјави дека ризикот од пренос со допирање површини е мал, но е зголемен во затворени простории. Според него, сонцето и другите фактори на отворено можат да го уништат, односно ослабат вирусот. Тој „умира“ брзо на порозни површини, но може да трае подолго на тврди површини на затворено.
Истражувањето исто така сугерира дека површински пренос е веројатен во првите 24 часа откако некој е заразен, односно домаќинствата во кои еден член бил заболен имаат низок степен на пренос ако во домот површините се чистат и дезинфицираат.
Значи, иако одржувањето на хигиена не е губење време, тоа и не е единствениот или дури и најважниот начин за намалување на ризикот, сметаат од Центарот.
„Во повеќето случаи чистењето на површини со средства за чистење, не со дезинфекција, е доволно за да се намали и онака нискиот ризик од пренос на вирусот низ површини. Дезинфекцијата не е потребна, освен ако во последните 24 часа во домот бил некој болен или позитивен на вирусот“, смета Хил.
Тој вели дека чистењето треба да го насочиме на подрачја со чести контакти како кваки и прекинувачи. Честото чистење и дезинфицирање на површини може да има минимално влијание на преносот на вирусот.
Според податоците, средствата за дезинфекција може да претставуваат ризик по здравјето, без притоа луѓето да се свесни за тоа.