Црвена звезда издаде соопштение во врска со срамната навреда на национална основа упатена кон Златан Ибрахимовиќ од лице во ложата на стадионот „Рајко Митиќ“ за време на синоќешниот дуел против Милан.
Синоќа целиот регион беше згрозен од неодговорното лице кое го навреди Ибрахимовиќ, кој не беше во стартната постава на Милан и го следеше натпреварот од трибините.
Покрај многуте клетви и пцости, неидентификуваното лице му рече на Ибрахимовиќ дека е „смрдлив балија“. Ибра е роден во Шведска, каде емигрирале неговите родители. Татко му е босански муслиман, а мајка му Хрватка.
„Црвена звезда најостро ги осудува навредливите повици кон Златан Ибрахимовиќ за време на синоќешниот натпревар со Милан. Како клуб, направивме сѐ организацијата на натпреварот да биде на ниво на два големи клуба и нема да дозволиме една примитивна индивидуа да стави дамка на традиционално познатата гостопримливост на нашата земја и нашиот народ. Црвена звезда во соработка со надлежните органи ќе ја пронајде споменатата личност и ќе инсистира да ги сноси сите последици од таквото однесување.
Црвена звезда најискрено му се извинува на Златан Ибрахимовиќ за непријатностите што ги доживеа во нашата куќа. Според старите српски обичаи, нашиот клуб отсекогаш бил добар домаќин и тој е познат низ цела Европа и така ќе остане и во иднина, бидејќи никогаш нема да толерираме вакви испади“, стои во соопштението на Црвена звезда.