Твитерџиите го разбрануваа интернетот со теоријата дека една епизода на популарната ТВ-серија „Black Mirror“ всушност ја раскажува голготата на поп-пејачката Бритни Спирс.
Се работи за епизода од петтата сезона на серијата, насловена „Rachel, Jack and Ashley Too“. Во епизодата, Мајли Сајрус ја игра поп-ѕвездата Ешли О, која е ограничена од нејзиниот менаџерски тим и нејзината тетка Кетрин, која ги контролира сите аспекти од нејзиниот живот.
Ешли е принудена да настапува, иако тоа не ја прави среќна, а нејзиниот менаџер исто така ја принудува да зема лекови. Исто така, Ешли е под надзор цело време. Кога Ешли се буни, Кетрин ја дрогира, предизвикувајќи пејачката да заврши во кома, а нејзиниот тим сепак се обидува да заработи пари на нејзиниот лик користејќи ги нејзините мозочни клетки за нов албум, а ќе ја претворат и во холограм.
Фановите учествуваат во спасувањето на Ешли.
Дали оваа приказна ве потсетува на нешто? Да, истото го воочија и твитерџиите.
„Па таа епизода на Black Mirror со Мајли Сајрус всушност беше за Бритни Спирс“, гласи твитот што вирално се шири на социјалната мрежа.
Кариерата на „Принцезата на поп-музиката“ сега е во рацете на законски старатели, откако таа имаше прилично јавна криза на менталното здравје пред 13 години. Спирс почна да се однесува неконтролирано во 2007 година, по разводот од Кевин Федерлајн во кој го изгуби старателството врз нивните две деца. Голем дел од нејзините наводни „нервни сломови“ се случија пред очите на медиумската јавност: Бритни се најде на насловните страници на таблоидите кога си ја избричи косата и беше фотографирана како удира со чадор по автомобилот на папарацо фотограф. Поп-пејачката имаше и неколку обиди за почнување психотерапија во установа.
Сега таа води правна битка против татко ѝ Џејми Спирс за прекин на договорот со кој тој има права на одлучување за нејзиниот живот и кариера. Деталите од договорот за законско старателство врз полнолетно лице никогаш не беа објавени за јавноста, но познато е дека Спирс има ограничувања на автономијата.
Бритни Спирс нема контрола врз нејзините финансии и кариерни одлуки од 2008 година наваму, согласно договор што во законите на САД се нарекува „conservatorship“. Според овој договор, таткото и адвокатот на Спирс менаџираат со нејзините финансии и личен живот, вклучувајќи забрана за посетители и комуникација со докторите во врска со нејзината терапија.
„Само сакам да си го вратам животот, поминаа 13 години и тоа е доволно. Доволно е и нема смисла воопшто... Јас завршив. Сакам да си го тужам семејството, да бидам целосно искрена“, рече таа во сведочењето пред судија минатата недела.
