Новинарката на магазинот Politico, Барбара Моенс, објави дека двете европски земји не се задоволни од препораката дадена од Европската комисија за Босна и Херцеговина во контекст на отворањето на преговорите и дека може да побараат дополнителни услови за официјално отворање на преговорите.
Претседателката на Европската комисија, Урсула фон дер Лајен, на почетокот на неделава најави дека ќе даде препорака за отворање на преговорите со Босна и Херцеговина. Затоа, Европскиот совет треба да гласа за давање зелено светло на 21 март, а датумот на Меѓувладината конференција на која конечно Босанците би ги отвориле преговорите со ЕУ не е познат.
Сепак, Холандија и Данска, според овој политички магазин, бараат дополнително објаснување зошто Босна и Херцеговина добила позитивен извештај и потенцираат дека мора земјата да добие дополнителни услови доколку сака да ги отвори преговорите.
„Голем број земји од ЕУ, вклучувајќи ги Холандија и Данска, предупредуваат дека Европскиот совет следната недела не треба едноставно да ѝ даде зелено светло на Босна и Херцеговина за почеток на пристапните преговори со ЕУ, како што препорача Европската комисија претходно неделава. На состанокот во средата, неколку земји од ЕУ побараа појаснување за изненадувачки позитивниот извештај на Босна и Херцеговина, рекоа четворица дипломати“, пишува Politico.
Тие наведуваат дека може да се постигне потенцијален компромис во однос на добивање зелено светло од Европскиот совет, исто како Украина и Молдавија, поради политичката и безбедносната ситуација. Сепак, оттаму посочуваат дека мора да се исполнат дополнителни услови за подоцна формално започнување на преговарачкиот процес.
„Нема да започнеме вистински преговори доколку нема повеќе реформи“, рече еден од дипломатите, според Politico.
Позитивни сигнали и добра волја дека Европскиот совет ќе ни даде зелено светло за отворање на преговорите стигнуваат од ЕУ изминативе неколку дена. Дополнителните услови не се нешто што се очекуваше, но овој процес е сосема нов, со оглед на новата методологија за пристапување, затоа нема преседан и е можна каква било одлука.