Четирите мали деца, кои беа пронајдени живи во Јужна Колумбија, пет недели откако авионот со кој патуваленсе урна во густа џунгла, се во болница во Богота во стабилна состојба.
Децата се истоштени, но среќни, велат нивните блиски кои не можат да ја опишат нивната среќа што малечките се пронајдени по повеќе од 40 дена.
„Ги видов моите внуци. Што е најважно, тие имаат живот во себе. Иако се многу исцрпени, тие се во добри раце“, изјавила нивната баба Фатима Валенсиа.
И дедото е пресреќен.
„Среќни се што го гледаат своето семејство. Добри се. Тие се деца на дивината, знаат како да преживеат во џунглата“, вели гордиот дедо Фиденсио Валенсиа.
Децата, кои се членови на племето Уитото, беа спасени во петокот откако 40 дена талкале во џунглата. Едногодишната Кристин, Солеини (9) и Тиен Нориел (4) се живи благодарение на нивната сестра Лесли (13), која е вистинска хероина.
„Преживеале јадејќи брашно, кое го нашле во авионот, а потоа јаделе семки“, вели дедото.
Бабата кажа дека борбеноста на нејзината најстара внука била пресудна за децата да преживеат во ужасите на џунглата.
„Таа се грижела за своите браќа и сестри. Им дала да го изедат тоа брашно, малку леб што имало и бобинки што ги нашле“, вели бабата.
Децата биле пронајдени на околу 5 километри од урнатините на авионот Cesna во кој летале со нивната мајка и уште двајца возрасни.
Според Националната организација на американските домородни народи на Колумбија, важен фактор кој одиграл улога во нивниот опстанок е фактот што тие се автохтони.
„Токму оваа посебна врска со природата ги дефинира. Преживувањето на овие деца е сведоштво за знаењето и односот што домородното население го одржува со природата, врска што се учи уште од времето кога се во утробата на нивната мајка“, се наведува.
