Американскиот актер Дени Мастерсон е осуден на затворска казна од 30 години до доживотно за силување на две жени.
Мастерсон глумеше во популарната ТВ серија „That '70s Show“ (кај нас позната како „Луди 70-ти“), која се емитуваше во времето кога ги изврши злосторствата во раните 2000-ти. Обвинителите тврдеа дека тој се потпирал на неговиот статус како истакнат член на Скиентолошката црква за да избегне последици.
Судијата Шарлејн Олмедо им дозволи на неговите жртви да читаат изјави пред судот пред изрекувањето на пресудата.
Поранешната истакната членка на Скиентолошката црква, актерката Леа Ремини, беше на сослушувањето и ги тешеше жените пред и откако ќе ги прочитаат изјавите.
„Посакувам порано да го пријавив во полиција“, изјавила една од жените.
„Ти простувам. Нема повеќе да ја поднесувам твојата болест“, рекла друга.
Мастерсон не кажал ништо на суд, а додека судијата ја читал пресудата и изрекол максимална казна, неговата сопруга Бижу Филипс заплакала.
Мастерсон беше прогласен за виновен во мај на повторното судење, откако првата порота не можеше да донесе пресуда во 2022 година. Откако беше осуден, актерот беше приведен поради ризик од бегство. Тој беше осуден откако три жени сведочеа дека сексуално ги нападнал во неговиот дом во Холивуд помеѓу 2001 и 2003 година, кога бил на врвот на својата слава. На судот му било кажано дека им давал дрога пред да ги злоупотреби.
Судот го прогласи за виновен за силување на две од трите жени кои го обвинија.
