Минатата недела светските медиуми ја пренесоа веста дека Брус Вилис ги продал правата за неговото лице на компанија која креира дигитални двојници. Но, неговиот портпарол негира дека станува збор за тоа, пренесе BBC.
Компанијата Deepcake се занимава со создавање виртуелни близнаци на различни актери, односно ги подмладува актерите во одредени нискобуџетни филмови.
Вилис се пензионираше во март годинава откако неговото семејство соопшти дека страда од афазија, состојба што влијае на неговиот говор. Но, BBC пренесе дека портпаролот на Вилис негира постоење на какво било партнерство или договор со компанијата.
Од друга страна, Deepcake за BBC тврди дека станува збор за погрешна формулација, Брус не ни може некому да продаде права кои нормално си се негови, но дал согласност пред да дознае дека боледува од афазија.
„Тој ни даде негова согласност и многу материјали за да создадеме негов дигитален двојник“, тврдат од Deepcake.
Компанијата тврди дека поседува уникатна библиотека од фотографии и видеа со висока резолуција од различни славни личности, инфлуенсери и историски личности.
На интернет сајтот, Deepcake ја промовира својата работа со цитат токму од Брус Вилис:
„Ја сакам прецизноста на мојот лик, тоа е огромна шанса за мене да се вратам назад во времето“.
Од компанијата тврдат дека со актерот работеле на вештачка интелигенција за реклама, па дури и ги препорачал на неговата интернет страница. Портпаролот на Вилис тоа не го потврди за BBC.
Deepfake компаниите користат вештачка интелигенција за создавање реалистични симулации на славни личности. Така, виртуелниот двојник на Вилис се појави во реклама за руската телеком компанија МегаФон минатата година.
Со помош на вештачка интелигенција е создаден „дигитален близнак“ на основа на 34.000 фрагменти од фотографии од филмови како Die Hard и Fifth Element. На тој начин, актерот веќе бил дел од реклама за руската телекомуникациска компанија МегаФон.
Целата конфузна ситуација со оваа нова технологија отвори прашања колку правила и прописи недостигаат за целата работа правилно да се регулира.