Во интервју за британскиот магазин The Sunday Times популарниот актер вели дека холивудската филмска индустрија го бојкотира поради лажните обвинувања дека ја претепал поранешната сопруга Амбер Херд.
Тој го спомна ова додека зборуваше за неговиот последен филм „Minamata“. Минатата недела филмот беше премиерно прикажан во Обединетото Кралство, но засега нема најави дека истото ќе се случи и во САД.
„Некои филмови ги погодуваат луѓето, а ова е еден од нив. Приказната што ја раскажува е слична на мојата. Како човек и актер, бев во безизлезна ситуација во последните неколку години. Холивуд ме бојкотира поради лажни обвинувања. Работам на тоа да ја извадам вистината на виделина“, рече тој.
Во „Minamata“, Деп го игра В. Јуџин Смит, фоторепортер кој во 70-тите години од минатиот век го посетил градот Минамата во Јапонија за да ги документира ефектите од труењето со жива.
На прашањето дали се идентификува со очајната состојба на Смит, Деп вели:
„Кон толкувањето на ликот на Смит не пристапив на тој начин, но сепак покажав некои од моите чувства. Изминативе пет години живеев во хаотична состојба“.
Деп и Херд се разведоа во 2017 година, откако таа го обвини дека ја тепал. Тој ги негираше сите обвиненија.
Во ноември минатата година Деп ја загуби тужбата за клевета против британскиот магазин The Sun, кој во напис од 2018 година го нарече насилник.
Во март годинава, тој изјави дека Херд се согласила седумте милиони долари кои ги доби од разводот да ги донира во добротворни цели. Воедно, Деп тврдеше дека пресудата треба да се укине, но судот сепак потоа ја потврди.