Лука Јовиќ повеќе не е член на Реал Мадрид - 24-годишниот напаѓач кариерата ја продолжи во Фиорентина.
Јовиќ пред три години дојде во Реал од Ајнтрахт како 21-годишник со отштета од 63 милиони евра, кога стана дури седми најскап играч во историјата на најголемиот европски клуб.
Сепак, тој не ги оправда очекувањата и заслужено се смета за едно од најголемите промашувања на „Кралевите“ во историјата.
На 51 настап за Реал постигна само 3 гола, па не е ни чудо што мадридскиот клуб на крајот го пушти бесплатно да се пресели во Фиорентина.
Во Фиренца го пречекаа како голема ѕвезда со помпезна најава дека играл за Црвена звезда, Бенфика, Ајнтрахт и Реал Мадрид и дека во кариерата постигнал дури 60 голови.
Исто така, од Фиорентина напоменаа дека се работи за исклучително трофеен играч кој покрај своето име ја има освоено Лигата на шампионите, двапати Ла Лига и Купот на Германија.
Српскиот репрезентативец со „Виолетовите“ потпиша договор до летото 2024 година.
