На едноставен начин подгответе го овој традиционален прилог за слави кој секоја празнична трпеза треба да го има.
Пченицата од дамнешни времиња е симбол во православниот свет. За секоја домаќинка е важно покрај традиционалниот колач на својата трпеза за куќната слава да се најде и убава и вкусна пченица.
Според традицијата, по сечењето на колачот, со пченицата прво се послужува домаќинот, а потоа останатите домашни. На крајот се послужуваат сите гости, како и секој што дополнително како гостин ќе дојде на славата, прво се послужува со пченица.
Пченицата најчесто ја служи домаќинката или девојка која живее во куќата, ќерка или внука, и тоа на следниов начин: домаќинката ја носи пченицата до гостинот, тој станува, се прекрстува, се врти кон домаќинката и домаќинот, им честита за славата и зема од пченицата, по што повторно се прекрстува и седнува на место. Пченицата прво се послужува на постарите, а потоа на помладите. Послужавникот со пченица стои покрај славската свеќа додека трае славата.
Доколку кога славата ќе заврши ви останала пченица, треба да им ја поделите на децата или да им ја спакувате за дома на децата од присутните гости.
Потребни состојки:
- 500 гр пченица
- 500 гр шеќер во прав
- 500 гр мелени ореви
- 2 кесички ванилин шеќер
- пола лажичка цимет
- пола лажичка морско оревче
- мелени ореви и половинки ореви (за декорација)
Подготовка:
Сварете ја пченицата па процедете ја. Сомелете ја на машина за мелење месо. Потоа соединете ја со шеќерот во прав и мелените ореви. Во подготвената смеса додадете ги двете кесички ванилин шеќер, циметот и морското опревче. Така подготвената пченица ставете ја во чинија, измазнете ја, посипете ја со мелени ореви и по желба украсете ја со половинки од цели ореви.
