Како што стојат работите, швајцарските Алпи наскоро би можеле да бидат покриени со кактуси, а вистинското прашање во врска со ширењето на овој инвазивен вид, кој е фаворизиран од топла и сува клима, е - како е тоа можно?
Кога ќе помислиме на кактуси, во нашата глава се создава слика на пустина или сушна област покриена со карпи, од која овде-онде ѕиркаат некои од растенијата познати по своите боцки. Ретко кој би помислил дека на пример Opuntia - кактус по потекло од Мексико, може да се најде на швајцарските Алпи. Меѓутоа, поради климатските промени, оваа некогаш незамислива ситуација стана реалност.
Биолозите како Јан Трипонеца веруваат дека ова растение е присутно таму уште од XVIII век, што не е чудно ако се земе предвид дека пред неколку века се раширило во Европа и Медитеранот. Се проценува дека во некои делови на кантонот Вале ова растение во иднина може да покрие до една третина од расположливата површина.
Како една од причините зошто тука преживуваат и напредуваат бодликавите кактуси Opuntia ботаничарите ја наведуваат нивната способност да издржат температури од -15°C. Меѓутоа, околноста што секако не им одговара е преголемата влажност, но со оглед на тоа што на овие простори снежната покривка секоја година сѐ повеќе се намалува - нема многу пречки кои би го спречиле нивниот напредок.
Според метеоролозите, снежната покривка на швајцарските Алпи моментално е на историски минимум, што тие тврдат дека е настан без преседан. Додека некои студии сугерираат дека бројот на снежните денови е преполовен од 1970 година, фотографиите од напуштените скијачки патеки и лифтови во екот на сезоната зборуваат за тоа.