Елиф Елмас и официјално е нов играч на Лајпциг. Четвртопласираниот клуб во Бундеслигата за трансферот на македонскиот репрезентативец издвои 25.000.000 евра.
Договорот беше потпишан до јуни 2028 година, а стапува на сила на 1 јануари. Следниот ден Елмас ќе им се придружи на новите соиграчи на мини-подготовки за пролетниот дел од сезоната. Од таборот на Лајпциг објавија дека играчот од средниот ред го одбрал дресот со бројот 6.
🚨 Eljif Elmas will join RB Leipzig from January 2024! ✍️
— RB Leipzig English (@RBLeipzig_EN) December 27, 2023
Welcome to the club, Eljif! 🔴⚪️
„Со трансферот на Елиф Елмас успеавме да затвориме важна позиција во напаѓачката линија од која заминува Емил Форсберг. Го следиме Елмас долго време, тој е многу возбудлив играч кој со себе го носи 'целиот пакет', одлично одговара на потребите на нашиот тим, навистина ни се допаѓаат неговите квалитети и доблести“, изјави Роувен Шредер, спортски директор на Лајпциг.
И Елмас не го криеше задоволството што по Серија А кариерата ќе ја продолжи во германската лига.
„За мене е остварување на сонот што се преселив во Бундеслигата и што ќе играм за Лајпциг. Фудбалската филозофија на клубот е контрапресинг, брзина и офанзивна моќ, што е стил кој совршено ми одговара. Овој тим е добар спој на млади врвни таленти, кои можат да се развиваат овде, и играчи кои долго време се во Лајпциг и носат искуство. Поради сето тоа преселбата во Лајпциг е вистинскиот потег за мене“, истакна Елмас за клупската веб-страница.
Елиф Елмас е роден во Скопје, играше за Работнички од кој се пресели во Фенербахче, а оттаму во 2019 година во Наполи за кој одигра речиси 185 натпревари и постигна 19 голови.
Ќе остане запишан во историјата на Наполи, како дел од тимот кој по 33 години ја врати титулата во градот под Везув.