Сопственикот на компаниите Tesla и SpaceX, Илон Маск, кој неодамна беше прогласен за најбогат човек на светот, повторно се најде на второто место на листата најбогати, откако неговото богатство падна за скоро 14 милијарди долари за еден ден.
Акциите на неговата компанија за електрични возила Tesla, вчера паднаа речиси за 8 отсто, со што нето-вредноста на богатството на Маск се намали за 13,5 милијарди долари, на 176,2 милијарди долари.
Така, според проценките на Forbes, откако минатиот петок накратко го престигна извршниот директор на Amazon, Џеф Безос, како најбогата личност на светот, Маск повторно се најде на второто место на таа листа.
Сега заостанува околу 6 милијарди долари зад Безос, чија нето-вредност се проценува на 182,1 милијарди долари. И акциите на Amazon вчера паднаа за повеќе од 2 процента, што значи намалување за 3,6 милијарди долари.
И покрај падот, Маск е сè уште околу 20 милијарди долари побогат од третиот најбогат човек во светот, францускиот тајкун во секторот луксузни стоки, Бернар Арно. Неговото богатство, пак, се проценува на 154,6 милијарди долари.
