Данскиот фудбалер Кристијан Ериксен го одигра првиот натпревар по пауза од осум месеци во која се опоравуваше од срцев удар, а неговиот Брентфорд славеше против Саутенд со 3:2 на пријателски натпревар.
Ериксен пред осум месеци доживеа тежок срцев удар на натпреварот од ЕУРО 2020 меѓу Данска и Финска, но реши да ја продолжи кариерата иако му беше поставен дефибрилатор.
Нему му беше забрането да игра со дефибрилатор во Италија, но ја прифати поканата од најсилната лига во светот и ќе игра за Брентфорд во Премиер лигата. Тој денес го одигра својот прв натпревар таму.
Данецот, кој денеска го славеше 30-тиот роденден, одигра еден час на теренот, што е одлично со оглед на сето она низ кое помина и фактот дека не играше фудбал осум месеци.
На натпреварот запиша и асистенција за голот на Џош Дасилва, а во два наврата голманот на Саутенд го спречи да го постигне толку посакуваниот гол.
Ова е секако одлична вест за сите љубители на фудбалот бидејќи Ериксен не сака да се откаже и покрај големите здравствени проблеми. Останува да видиме колку може да донесе со играњето во Премиер лигата.