Италијанските медиуми пренесуваат дека премиерлигашот Евертон сака во своите редови да го донесе македонскиот репрезентативец Елиф Елмас, кој ги брани боите на Наполи.
Наполи летово работи на трансформација на тимот, па можно е да му дозволи на нашиот Елмас да го напупшти клубот. Денеска на медицински прегледи во Неапол се пристигнати две нови засилувања, и тоа Џакомо Распадори од Сасуоло и Танги Ндомбеле од Тотенхем, и двајцата офанзивци, што значи дека клубот ќе треба и да се ослободи од некои кои се вишок.
Еден од тие, а за кој постои и интерес од други клубови, е токму македонскиот репрезентативец Елиф Елмас. Според трансфер експертот на Sky Sport Italia, Џанлука Ди Марцио, Евертон е заинтересиран за Елмас, а Наполи би можел да се ослободи и од Мексиканецот Ирвинг Лосано, за кого се интересира Манчестер Јунајтед.
Елмас никогаш не стана стандарден првотимец во Наполи и најчесто влегува во игра од клупата за резерви, како што беше случај и на отворањето на сезоната во Серија А минатиот викенд кога ги одигра последните 22 минути на гостувањето кај Верона. Следниот месец ќе наполни 23 години, а договор со Наполи има до 2025 година. Вредноста на македонскиот бисер според Transfermarkt се проценува на 24 милиони евра. Од доаѓањето во Наполи летото 2019 има одиграно 127 натпревари во сите натпреваруња, постигна 11 гола и асистираше 8 пати.
