Ноќниот живот во Вухан се врати во нормала, седум месеци откако градските власти ги укинаа строгите ограничувачки мерки поради пандемија со COVID-19 што почна токму од овој кинески град.
Една од првите што ги почувствува придобивките од ноќниот живот беше Џанг Кјонг, која го прослави својот 29-ти роденден со пријателите во голем паб во Вухан.
„После сè низ што поминав за време на првиот бран на пандемијата на коронавирус во Вухан, а потоа откако бев ослободенс од рестриктивните мерки, се чувствувам како да живеам втор живот“, рече Џанг која работи во продавница за текстил во Вухан.
Додека таа и нејзините пријатели го славеа нејзиниот роденден, луѓето надвор се радуваа, имаше забави низ целиот град, со еден збор, Вухан се претвори во фестивалски град каде животот се живее „со полни гради“, а младите се журкаат „како да нема утре“.
Наводно, во Вухан не е забележана нова локална инфекција со COVID-19 од 10 мај.
Истовремено, во остатокот од светот, а особено Европа и САД, се затвора сè што може да се затвори пред претстојните новогодишни празници, бидејќи бројот на новозаболени и починати ги соборува сите рекорди од ден на ден.
Нови „празнични“ локдаун мерки најавија Германија, Холандија и Чешка, а кај нас во периодот од 18 декември до 20 јануари на полноќ угостителските објекти да работат до 18 часот наместо како досега до 21 часот, а изречени се и забрани за организирање новогодишни и предновогодишни прослави на отворен и затворен простор, препораки до верските заедници да не повикуваат на масовни групирања за претстојните верски празници, како и препорака до општините и работните организации да не организираат прослави.
