Се чини дека е на повидок крај на сагата на Лукаку да најде нов клуб, бидејќи Фабрицио Романо го најави трансферот на белгискиот напаѓач.
Со своето познато „Here we go“, реномираниот италијански новинар го лансираше Белгиецот во Рома.
Според неговите информации, Лукаку денеска ќе се упати во Вечниот град за да го финализира трансферот, односно позајмицата од Челси, чиј играч сѐ уште е.
Тој треба да го носи дресот на Рома до крајот на актуелнава сезона во која ќе заработи 7,5 милиони евра.
Во друштвото на чело со Жозе Мурињо конкуренција на позицијата централен напаѓач ќе му биде Андреа Белоти.
Лукаку со Мурињо веќе има соработувано, кога двајцата беа во Манчестер Јунајтед.
Ова би требало да му биде осми клуб во кариерата, а во минатото настапуваше за Андерлехт, Челси, Вест Бром, Евертон, Манчестер Јунајтед и Интер.
За белгиската репрезентација постигна 75 гола на 108 официјални натпревари.
Летово неславно се раздели со Интер, а прво на големо се зборуваше дека ќе се префрли кај Јувентус, што предизвика негодувања кај навивачите на торинскиот клуб.
