Играчот на Манчестер Јунајтед упати пофалби и честитки до нашиот Стефан Ристовски кој доби чест да биде капитен на Спортинг.
Бруну Фернандеш и Ристовски играа заедно за лисабонски Спортинг додека пеналџијата не се пресели на Островот во јануари, а двајцата истото лето 2017 дојдоа во клубот и оттогаш се пријатели.
Во неделата Спортинг играше пријателски натпревар со Беленесеш на кој по почетниот состав не беше капитенот Себастијан Коатес, па лентата ја доби нашиот Стефан. Спортинг победи со 3:1, а Уругваецот влезе во второто полувреме.
Фернандеш знае колку му значеше на Ристовски таа чест, па по тој повод му посвети стори на Instagram.
„Знам колку си горд и возбуден за шансата да бидеш капитен на клубот кој толку многу го сакаш! Никогаш не сум видел странец толку да ја почитува и да биде посветен на нашата земја и клубот кој го застрапува! Го заслужи ова и заслужуваш уште повеќе“, напиша Фернандеш.
Ристовски исто така посвети неколку зборови на Instagram: „Благодарам за капитенската лента!!! Чест ми е. Доаѓам од мала земја... многу млади, деца, сонуваат да играат за ваков клуб... за мене денес беше голем ден и огромна гордост да ја носам капитенската лента и да го претставувам Спортинг“.