Четирикратниот Ф1 светски шампион, Германецот Себастијан Фетел, во разговор за Sky Sports откри дека не ја исклучува можноста за враќање во Формула 1 шампионатот од каде се откажа во 2022 година.
Фетел 4 пати беше светски Ф1 првак (2010, 2011, 2012 и 2013), а во кариерата оствари 53 гран при победи.
Од формулата се откажа на крајот од 2022 година по двегодишниот ангажман во тимот на Астон Мартин.
Во интервју за Sky Sports беше прашан дали постои можност да тргне по стапките на Алан Прост, Ники Лауда, Најџел Мансел, Кими Раиконен и Фернандо Алонсо, кои се вратија во Ф1 по одредена пауза. Фетел одговори: „Не можам да кажам не, бидејќи никогаш не се знае“.
„Да сте ги прашале сите нив, веројатно некои ќе ви кажеле 'не', други 'не знам', а на крајот сите се вратија. Затоа не можам тоа да го исклучам. Ќе зависи од предизвикот, каков и да е, но во моментов тоа не ми е во глава“, рече 36-годишниот Германец.
Истакна дека е во добра форма откако си замина од Ф1.
„Во добра форма сум, но затоа што така сакам. Претпоставуивам дека мојаот врат (сила) не е на потребното ниво, но сѐ останато е прилично добро, би рекол“.
Фетел сите 4 титули ги освои во болид на Ред Бул, а низ својата кариера возеше и за БМВ Заубер, Торо Росо, Ферари и Астон Мартин.
