Легендарниот Луиш Фиго (всушност правилно е Фигу) моментално е на Хвар од каде порача дека репрезентацијата на Хрватска по второто место во Русија 2018 може сега да дојде и до златниот пехар.
Поранешниот португалски виртуоз се наоѓа на јадранскиот остров Хвар каде заседава Извршниот одбор на УЕФА.
„Мислам дека Хрватска е потенцијален кандидат за освојување на Светското првенство. Имавте голема шанса на минатиот Мундијал, мислам дека ако продолжите така да работите и се обидете да сте што подобри и подобри како останатите репрезентации, имате одлични играчи. Така да, ви посакувам среќа на првенството“, рече тој во изјава за Nova TV.
Фиго смета и дека Лука Модриќ е најдобриот играч од средниот ред на денешницата.
„Мислам дека е еден од најдобрите играчи во светот, еден од најдобрите момци во светот, исто така. Добар другар е. Мислам дека заслужува сѐ најдобро. Треба да сте горди на него. Не знам како му успева да биде на такво ниво во континуитет, сите овие години. Му посакувам и натаму да ужива во фудбалот и на ова исто ниво да трае што подолго“.
Португалецот откри дека не е прв пат на Хвар: „Секогаш ми причинува задоволство кога доаѓам на Хвар. Бев овде на лето пред неколку години. Сега сум тука работно. Се обидуваме да уживаме на ова место и да бидеме на важните состаноци“, заврши тој.
