Отворањето на Светското првенство во 2026 година ќе се одржи на 11 јуни на стадионот „Ацтека“ во мексиканската престолнина Мексико Сити, а ФИФА одлучи финалето да се игра на 19 јули во предградие на Њујорк, на стадионот „МетЛајф“.
Додека синоќа фудбалските вљубеници гледаа Интер - Јувентус, а некои Реал Мадрид - Атлетико, ФИФА одржуваше настан во живо на кој беше презентиран распоредот на натпревари за Мундијалот 2026, а кој за жал поради лошо одбраниот термин падна во сенка на дерби пресметките.
ФИФА потврди дека ова Светско првенство ќе биде затворено со спектакуларен финален натпревар на стадион кој може да прими повеќе од 82.000 луѓе, кога се во прашање фудбалските натпревари. Овој стадион е втор по големина од сите на кои ќе се игра Мундијалот.
Најголем број навивачи на „МетЛајф“ се забележани на пријателскиот натпревар помеѓу Манчестер Јунајтед и Арсенал, кој се одигра на 22 јули лани.
Станува збор за стадион кој се наоѓа во Источен Радерфорт, предградие на Њујорк во сојузната држава Њу Џерси, на околу 8 километри од центарот на Големото јаболко. Изграден е во 2010 година и е нов дом на НФЛ франшизите Њујорк Џајантс и Њујорк Џетс. Минатата година нивната пресметка ја следеа 83.367 гледачи на трибините.
На 11 јуни лани таму концерт одржа Ед Ширан на кој присуствуваа 89.106 фанови.
Очигледно е дека нѐ очекува преполн стадион во Њујорк, чија изградба чинеше вкупно над 1,6 милијарди долари и беше завршена во 2010 година, кога беше отворено ова здание.
ФИФА откри и дека натпреварот за третото место ќе се игра ден порано на „Хард Рок“ стадионот во Мајами, дом на Мајами Долфинс, исто така од НФЛ.
Двата полуфинални натпревари ќе се играат на 14 и 15 јуни на „AT&T“ стадионот во Арлингтон, Тексас и на „Мерседес-Бенц“ во Атланта, Џорџија.
Почнувајќи од четвртфиналето па сѐ до финалето сите натпревари ќе се играат во САД.
Натпреварите на трите земји домаќини ќе бидат на самиот почеток. Мексико ќе ја има честа да го отвори Мундијалот на 11 јуни на својот „Ацтека“, стадион кој по трет пат ќе биде мундијалски домаќин по турнирите во 1970 и 1986. Овој стадион, воедно, со капацитет од 87.523 гледачи е најголем на овој Мундијал. Истиот ден ќе има уште еден дуел на „Акрон“ стадионот за Запопан.
Наредниот ден ќе има два натпревара на кои ќе играат кодомаќините Канада на „БМО Филд“ во Торонто и САД на „СоФи“ во Инглвуд. Со капацитет од само 30 илјади, „БМО Филд“ е најмалиот стадион на Мундијалот. Дом е на МЛС франшизата Торонто.
Сите стадиони ќе добијат нови привремени имиња со оглед на тоа што прваилата на ФИФА забрануваат употреба на имиња на спонзори како имиња на стадионите. Тоа ќе важи само за време на Мундијалот.
