Финските пратеници денеска ќе расправаат за тоа како да се справат со петицијата со која се бара гласање за членство во НАТО, бидејќи таа покажа историска промена на ставот во традиционално неврзаната земја, по руската инвазија на Украина.
Премиерката Сана Марин во понеделникот вечерта изјави дека планираната дебата во парламентот следниот ден ќе ја опфати ситуацијата во Украина и дека нема намера да биде „поширока дискусија за политиката на Финска за воено (не)врзување“.
Но, таа додаде дека, бидејќи петицијата на граѓаните со барање за расправа во парламентот за референдумот ги достигнала потребните 50.000 потписници за да започне расправа во парламентот, „логично е да се слушнат ставовите на партиите за решавање на ова прашање“.
„Од оваа перспектива, тоа прашање ќе се најде на утрешната парламентарна расправа“, рече Марин.
Петицијата, која повикува на референдум за членство, беше покрената минатиот понеделник и ја достигна целта од 50.000 до крајот на неделата.
Дискусијата доаѓа и по анкетата објавена во понеделникот на јавната телевизија Yle, која покажува дека повеќето Финци сега се за влез во НАТО, според анкетата чии резултати беа објавени вчера. Историска промена на ставот е голема промена во однос на јавното мислење пред само неколку месеци.
Според истражувањето нарачано од јавната телевизија Yle, 53 отсто од Финците го поддржуваат влезот на земјата во воен сојуз, 28 отсто се против, а 19 отсто не се сигурни.
„Целосно историски и извонреден резултат“, рече Чарли Салониус-Пастернак, виш научен соработник во Финскиот институт за меѓународни односи.
„Единственото значајно нешто што се промени е тоа што Русија нападна соседна земја која не е членка на НАТО“, додаде Салониус-Пастернак.
