И покрај пандемијата на коронавирус, четврта година по ред Финска остана на врвот на листата на најсреќни земји во светот. Од 149 земји, Македонија е на 94 место.
Новиот извештај на ОН годинава малку се разликува во начинот на собирање информации, поради коронавирусот.
За авторите на истражувањето не е никакво изненадување што Финска е највисоко пласирана на основа на мерката на меѓународна доверба, што помогна многу во време на пандемијата. Финска ја води премиерката Сана Марин и таа е една од 23 држави опфатени во истражувањето, чиј лидер е жена.
Индексот на среќа се темели на различни фактори како БДП по жител, очекуван животен век на граѓаните, степенот на слобода, перцепцијата на корупција во владата и институциите и слично. По Финска следат Данска, Швајцарија, Исланд, Холандија, Норвешка, Шведска, Луксембург, Нов Зеланд и Австрија, меѓу првите десет.
Од регионот и поранешните југословенски држави, Словенија е на 29. место, Косово на 33, Србија на 48, Хрватска е на 60. место, Босна и Херцеговина на 64, Грција на 68, Црна Гора на 72, Бугарија на 88, Албанија на 93, Македонија на 94 место.
Канада е на 14 место, САД се на 20 место, Русија на 77, Кина на 85, а Индија на 140. место.
Дното на листата од 149 држави опфатени од статистиката го заземаат Руанда, Зимбабве и Авганистан.
Извештајот за ОН е објавен ден пред Светскиот ден на среќата кој се слави на 20 март.