Британскиот боксер Тајсон Фјури синоќа на стадионот на Тотенхем ја одбрани титулата светски шампион во тешка категорија според верзијата WBC, победувајќи го сонародникот Дерек Чисора (38).
Непоразениот шампион стигна до својата 33-та победа во кариерата во која има и еден нерешен резултат. Од друга страна, Чисора го забележа 13. пораз, а во кариерата има 33 победи.
На спектаклот во Лондон присуствуваа над 60.000 гледачи. Чисора одлично влезе во мечот, но Фјури брзо ја презеде контролата и во втората рунда силно го стресе со аперкат, а потоа му зададе уште неколку силни удари.
Во третата рунда Фјури целосно доминираше и чудо беше како Чисора остана на нозе, додека четвртиот круг беше прилично изедначен откако Чисора ја преброди кризата.
Фјури беше подобриот противник во петтата и шестата рунда, а јасно беше дека Чисора не може да го надбоксува шампионот, иако се држеше.
„Кралот на циганите“ целосно го уништи својот ривал со жестоки удари од далечина до крајот, а мечот беше прекинат во 10-тата рунда кога Чисора целосно колабираше и повеќе не беше активен во рингот.
Ова беше трета борба меѓу британските боксери, а Фјури победи во сите три.
Првиот меч се одржа во јули 2011 година, кој со едногласна одлука му припадна на Фјури, а на реваншот во ноември 2014 година непоразениот шампион славеше со прекин во 10. коло.
Фјури (34) по победата го прозва Олександр Усик.
„Каде е тоа зајаче Олександр Усик? Ти си следниот!“, рече Фјури.
Мечот меѓу Фјури и Усик би можел да биде договорен за февруари или март, а во игра ќе бидат сите најважни појаси во светот на боксот – WBC на Фјури и WBA, WBO и IBF на Усик.