Фудбалерите на Флуминенсе станаа шампиони на Јужна Америка откако во финалето на Копа Либертадорес ја совладаа Бока Жуниорс со 2:1 по продолженијата.
Средбата на иконската „Маракана“ ги оправда очекувањата, а видовме спектакуларен дуел.
Флуминенсе поведе во 36. минута кога Кено му асистираше на Херман Кано за 1:0, а тој резултат стоеше на семафорот до 72. минута кога перуанскиот десен бек Луис Адвинкула израмни на 1:1 на асистенција на Кристиан Медина.
Натпреварот отиде во продолженија, а во 99. минута Кено забележа уште една асистенција, овојпат за Џон Кенеди, кој погоди за водство на Флуминенсе од 2:1.
Но, тука не беше крајот на возбудувањата бидејќи само две минути подоцна Кенеди беше исклучен, а Бока Жуниорс имаше предност од играч повеќе.
Бока бројчаната предност на теренот ја загуби во 7. минута од судиското надополнување на првиот дел од продолжението кога беше исклучен Колумбиецот Франк Фабра, а до крајот на натпреварот немаше голови, па така Флуминенсе ја освои првата титула во Копа Либертадорес, додека Бока остана на шест.
На овој начин легендарниот лев бек Марсело го заокружи подвигот кој во кариерата го постигнуваат само ретки играчи - стана клупски шампион на Европа и Јужна Америка. Ова беше негов 28. трофеј во клупската кариера, а вкупно 29 благодарение на освоениот Куп на конфедерации со Бразил во 2013 година.
На спротивната страна беше Единсон Кавани, кој откако во 2020 го загуби финалето во Лигата на шампионите со ПСЖ, сега не успеа да го освои ниту јужноамериканскиот пандан.
Интересно, Флуминенсе ја продолжи доминацијата на бразилските екипи во Копа Либертадорес, со оглед на тоа што Фламенгу и Палмејрас по двапати беа најдобри во последните четири години.
Со освијувањето на Либертадорес, Флуминенсе се избори за деби настап на Светското клупско првенство во декември во Саудиска Арабија. Како шампион на Јужна Америка ќе почне од полуфиналето каде на 18 декември ќе игра со победникот од дуелот на африканскиот шампион Ал-Ахли (Египет) против квалификантот, домаќинот Ал Итихад (Саудиска Арабија) или океанскиот шампион Оукленд Сити (Нов Зеланд). Во другото полуфинале Манчестер Сити го чека победникот од Леон (Мексико) и Урава Ред Дајмондс (Јапонија).